Harpa með þrennu og tvö sláarskot í Stjörnusigri

Harpa Þorsteinsdóttir skoraði öll mörk Stjörnunnar þegar liðið vann 3-0 sigur á ÍBV í fyrstu umferð Pepsi-deildar kvenna í kvöld en leikurinn fór fram á Samsung-vellinum í Garðbæ.

Harpa skoraði tvö mörk á fyrstu 24 mínútum leiksins en hún var ótrúlega nálægt því að innsigla þrennuna þegar hún átti tvö sláarskot í seinni hálfleiknum. Harpa átti frábæran leik í kvöld og er greinilega til alls líkleg í framlínu Garðabæjarliðsins í sumar.

Þrennan datt síðan inn í uppbótartíma leiksins en Harpa var þá búin að fá fjölda færa í seinni hálfleiknum.

Stjörnukonur voru með yfirburði í fyrri hálfleiknum en Eyjakonur bitu aðeins meira frá sér í þeim seinni. Stjörnuliðið átti hinsvegar miklu hættulegri færi allan leikinn og auk sláaskota Hörpu þá átti Rúna Sif Stefánsdóttir einnig stangarskot í seinni hálfleiknum.