Bjarki Már samdi við FH

Bjarki Már Elísson er nýr leikmaður FH en hann hefur skrifað undir tveggja ára samning við Hafnfirðinga.

Þetta staðfestir hann í samtali við handbolti.org en orðrómur hefur verið lengi á kreiki um að Bjarki Már muni spila með FH á næstu leiktíð.

Hann hefur einnig haft áhuga á að komast að hjá erlendu liði og hefur enn möguleika á því fram á sumar. Hann segist geta samið við erlend lið fyrir 1. ágúst næstkomandi.

Bjarki Már var sterklega orðaður við rússneska liðið Medwedi en útlit er fyrir að ekkert verði af þeim félagaskiptum.