Landssamband veiðifélaga varar við því að núverandi leyfakerfi til að ala lax af norskum uppruna í sjókvíum við strendur landsins verði kollvarpað.
Þetta kemur fram í harðorðri fréttatilkynningu sambandsins. Landsamband veiðifélaga hefur óskað eftir fundi með atvinnuvegaráðherra til að ræða þessi mál. Þá segir jafnframt að yfirlýsingar atvinnuvegaráðherra í fjölmiðlum bendi til þess að nú eigi að láta undan þrýstingi fiskeldismanna og slaka á kröfum í umhverfismálum við leyfisveitingar. "Saga laxeldis við strendur Ísland ætti að vera stjórnvöldum og öðrum viðvörun um þá áhættu sem þessum atvinnuvegi er búin."
Þá minnir Landssambandið á að þegar hrogn voru flutt inn frá Noregi á sínum tíma var gert samkomulag um að lax af norskum uppruna yrði aðeins alinn í eldisstöðvum á landi en ekki settur í sjó. "Þetta samkomulag hefur verið þverbrotið og nú virðist eiga að ganga lengra í þeim efnum. Landssamband Veiðifélaga telur fráleitt að hverfa frá því fyrirkomulagi sem nú er við lýði og felur í sér að álits sérfræðinga er aflað þegar Skipulagsstofnun metur hvort umhverfismats er þörf."
Alrangt er sem haldið hefur verið fram að flókið leyfisferli standi laxeldi á Íslandi fyrir þrifum. "Það er fyrst og fremst hin miklu og mengandi áhrif laxeldis á umhverfið sem gerir það að verkum að nauðsynlegt er að gæta fyllstu varúðar," segir í tilkynningunni en undir hana ritar Óðinn Sigþórsson, formaður LV.
Haukar
FH
