Raikkonen fær ekki launin sín

Stærstu tíðindin í Formúluheiminum á þessu ári voru þegar Kimi Raikkonen tilkynnti að hann væri á leið til Ferrari frá Lotus. Nú liggur fyrir af hverju hann fór til Ferrari.

"Ég hef ekki fengið launin mín. Ég vil samt bara keppa og það er ástæðan fyrir því að ég fer til Ferrari," sagði Finninn.

Hann er með 1,3 milljarða í árslaun hjá Lotus en liðið virðist ekki ráða við að greiða honum þau laun.

"Þetta er mjög óheppilegt en ég vil hjálpa liðinu og vinna einhverjar keppnir," sagði Raikkonen en hann ætlar að klára tímabilið með liðinu þrátt fyrir launaleysið.