Sannleikurinn: Blá ruslatunna fyrir ruslpóst

10. október næstkomandi taka í gildi nýjar reglur um sorphirðu í Reykjavík. Eiga þær að einfalda flokkun heimilissorps en núverandi kerfi hefur reynst of flókið fyrir takmarkaða heila borgarbúa sem eiga í fullu fangi með að hugsa aðeins um sjálfan sig.

Borgin hefur lengi viljað auka flokkun á sorpi enda framleiðir hver Reykvíkingur að meðaltali tífalt meira af sorpi en aðrir landsmenn. Hafa ber þó í huga að flestir tónlistarmenn landsins eru búsettir í Reykjavík og margir þeirra gefa eitthvað út á hverju ári.

Nýju reglurnar fela í sér að borgarbúar borga 6.500 krónur á ári fyrir bláa sorptunnu fyrir alla auglýsingabæklingana og ruslpóstinn sem þeir náðarsamlega fá en ef snefill af pappír finnst í sorptunnu af öðrum lit en bláum, eru tunnurnar þeirra ekki losaðar af starfsmönnum Sorphirðu Reykjavíkur. Þá þarf fólk að hreinsa pappírinn úr tunnunni sinni og flokka eða það sem er auðveldara, bara henda ruslinu sínu út á götu þar sem starfsmenn hverfastöðva Reykjavíkurborgar neyðast til að fjarlæga það.

Einnig er hægt að gera eins og Reykjavíkurborg og einfaldlega losa sig við sorpið sitt í Reykjanesbæ.





Sannleikurinn rekur öfluga og óvæga fréttastofu þar sem engum er hlíft og sannleikurinn skiptir ekki höfuðmáli. Sannleikurinn er háður öllum stjórnmálaflokkum og hagsmunaaðilum um fréttaefni sitt. Fréttastofa Sannleikans hefur Facebook-síðu  en hún er drasl.