Fannst ekki spennandi að spila Little Talks fimm sinnum á dag

Árni Guðjónsson, fyrrverandi hljómborðsleikari Of Monsters and Men, spilar nú með hljómsveitinni Blóðberg og kennir tónmennt í barnaskóla Garðabæjar í afleysingum. Hann var í spjalli í útvarpsþættinum Harmageddon í gær og var þar spurður afhverju hann hætti í Of Monsters and Men. Hægt er að hlusta á viðtalið hér að ofan.

Þar gerði Árni lítið úr þeirri ákvörðun sinni og virtist ekki sakna þess mikið að ferðast um víða veröld með einni vinsælustu hljómsveit heims.



Að hans mati voru framtíðarplön sveitarinnar of yfirþyrmandi fyrir ári síðan þegar hann ákvað að segja skilið við sveitina. Honum var ljóst að ef hann héldi áfram gæfist honum lítill tími til annars en að vera á stöðugum tónleikaferðum næstu misserin.

„Að spila Little Talks fimm sinnum á dag hljómar ekkert rosalega spennandi fyrir mér,“ sagði Árni sem virðist hafa haft á réttu að standa með framtíð sveitarinnar en hún lauk núna nýverið nánast sleitulausri eins og hálfsárs tónleikaferð sinni með stórtónleikum á Vífilstaðatúni í heimabænum, Garðabæ.



En hvað hefur þú að gera heima sem er meira spennandi heldur en að vera í Of Monsters and Men?



Ég er svo heimakær og mikill einfari. Mér finnst svo rosa gott bara að setja kaffi í könnuna, sitja út á svölum og humma fram að hádegi, sagði Árni að lokum, glaður í bragði og sáttur við sitt.