Tiger tryggði Bandaríkjamönnum sigur í Forsetabikarnum

Besti kylfingur heims, Tiger Woods, tryggði Bandaríkjamönnum sigur í Forsetabikanum sem lauk í gær á Muirfield Village vellinum í Ohio, Bandaríkjunum. Leikið er annað hvert ár í þessari keppni og leika þar lið skipuð kylfingum frá Bandaríkjunum annars vegar og Alþjóðaúrvalinu hins vegar.

Mótið hófst á fimmtudag en lauk í gær þegar leikinn var tvímenningur þar sem 12 stig voru í boði. Bandaríkjamenn fóru með sigur af hólmi en heimamenn hlutu 18½ vinning gegn 15½ vinningi Alþjóðaúrvalsins. Kylfingar utan Evrópu og Bandaríkjanna eru gjaldgengir í lið Alþjóðaúrvalsins í Forsetabikanum. Leikið er með svipuðu fyrirkomulagi og í Ryder-bikarnum þar sem Evrópa og Bandaríkin mætast.

Bandaríkjamenn höfðu yfirhöndina frá upphafi voru alltaf í forystu. Tiger Woods tryggði svo heimamönnum sigur í gær eftir að hafa haft betur gegn Richard Sterne frá Suður-Afríku i tvímenning. Þetta er þriðja keppnin í röð þar sem Woods tryggir Bandaríkjunum sigur í keppninni en það gerði hann einnig árið 2009 og 2011.

„Þetta var sigur liðsheildarinnar. Við lékum mjög vel og náðum góðri forystu,“ sagði Woods eftir að sigurinn var í höfn. Liðsmenn Alþjóðaúrvalsins börðust af krafti á lokakeppnisdegi til að vinna upp forystu Bandaríkjamanna og unnu 7 af 12 leikjum tvímenningsins. Það var hins vegar ekki nóg þvi Bandaríkjamenn höfðu góða forystu fyrir lokakeppnisdag.

Þetta er í tíunda sinn sem keppnin fer fram. Bandaríkjamenn hafa átta sinnum staðið uppi sem sigurvegarar, Alþjóðaúrvalið einu sinni og árið 2003 sættust liðin á jafnan hlut. Nick Price stýrði liði Alþjóðaúrvalsins en Fred Couples því bandaríska. Couples gaf það út eftir mótið að hann myndi ekki stýra liðinu eftir tvö ár þegar leikið verður í Suður-Kóreu. Couples hefur stýrt Bandaríkjunum til sigurs í síðustu þremur keppnum.

Bandaríkin 18½ - Alþjóðaúrvalið 15½

Úrslit í tvímenning:

Hunter Mahan vann Hideki Matsuyama 3&2

Jason Dufner vann Brendon De Jonge 4&3

Brandt Snedeker tapaði fyrir Jason Day 6&4

Jordan Spieth tapaði fyrir Graham Delaet 1 niður

Zach Johnson vann Branden Grace 4&2

Bill Haas tapaði fyrir Adam Scott 2&1

Steve Stricker tapaði fyrir Ernie Els 1 niður

Matt Kuchar tapaði fyrir Marc Leishman 1 niður

Keegan Bradley tapaði fyrir Charl Schwartzel 2&1

Tiger Woods vann Richard Sterne 1 upp

Webb Simpson gerði jafntefli við Louis Oosthuizen

Phil Mickelson tapaði fyrir Angel Cabrera 1 niður