Sannleikurinn: Fimm enn í gæsluvarðhaldi grunaðir um að spila jólalög

Allir fimm sakborningarnir í stóra Helgu Möller-málinu svokallaða neita sök. Þeir eru sakaðir um að hafa byrjað að spila jólalög í nóvember og einn þeirra er einnig sagður hafa verið byrjaður að skipta um perur í útijólaseríu. Þeir eru ákærðir fyrir stærstu brot á hátíðarhöftum sem eru til meðferðar hjá sérstökum saksóknara.

Mennirnir eru sakaðir um að hafa í sameiningu verið komnir í jólaskap allt of snemma með þeim afleiðingum að fjöldi fólks varð pirrað. Stemningin var samkvæmt ákæru rekin í nafni hátíðarandans.

Hinir ákærðu hafa allir setið í gæsluvarðhaldi síðan í byrjun nóvember vegna almannahagsmuna en saksóknari telur víst að verði þeim sleppt muni þeir byrja að kaupa jólagjafirnar og baka piparkökur.

Hæstiréttur staðfesti á föstudaginn gæsluvarðhaldsúrskurði yfir mönnunum en allir höfðu þeir kært úrskurð héraðsdóms til Hæstaréttar. Að minnsta kosti tíu sambærileg mál eru í rannsókn hjá sérstökum saksóknara. 





Sannleikurinn rekur öfluga og óvæga fréttastofu þar sem engum er hlíft og sannleikurinn skiptir ekki höfuðmáli. Sannleikurinn er háður öllum stjórnmálaflokkum og hagsmunaaðilum um fréttaefni sitt. Fréttastofa Sannleikans hefur Facebook-síðu  sem er óvanalegt á þessum árstíma.