Söngleikur Verslinga talinn klámfenginn

„Já, ég hef orðið vör við gagnrýnina. Þessi viðbrögð koma mér dálítið á óvart en ef ég set mig í spor þeirra sem ekki hafa séð leikritið í heild skil ég að myndbandið gæti virkað stuðandi á suma. En ég stend við bakið á verkinu,“ segir Björk Jakobsdóttir, leikkona og leikstjóri söngleiksins VÍ Will Rock You, sem Nemendafélag Verzlunarskóla Íslands setur upp í Austurbæ.

Tónlistarmyndband úr sýningunni má nú finna á vefsíðunni Youtube og hefur það hlotið nokkra gagnrýni. Á samfélagsmiðlum er myndbandið meðal annars sagt klámfengið og ákveðin tímaskekkja. Björk er þessu ósammála og segir verkið ádeilu á íslenskt samfélag eins og það var fyrir hrun.

„Þetta er ádeila á staðlaðar kynjaímyndir. Við byrjum í útskrift í Versló og síðan er farið yfir í Glitlandsbyr og þangað kemur ráðgjafateymið Killer Queens frá Cayman-eyjum sem eru hálfgerðar „slöts“ og ætla með brögðum að taka yfir bankann. En miðpunktur sögunnar er falleg ástarsaga tveggja drengja. Mér þykir voða leiðinlegt ef þetta hefur snert viðkvæmar taugar hjá einhverjum og ég hvet alla til að koma og sjá sýninguna og dæma svo. Að mínu mati er ekki verið að hlutgera konur í verkinu og sjálf er ég gallharður jafnréttissinni.“

Spurð hvort henni finnist dansatriðið hæfa menntaskólaleikriti segir Björk atriðið ekki stuða hana á nokkurn hátt.

„Sonur minn er í sýningunni og myndbandinu og kannski er ég bara svona líbó, en ég þekki líka ádeiluna og húmorinn í verkinu. Mér finnst þau [krakkarnir] töff og flott og ég get ekki gert að því þó sumar stelpurnar vilji vera í diskóbuxum. Ég get alveg viðurkennt að þær eru full „sassy“ en það er ekkert sem kemur úr þessu myndbandi heldur myndböndum sem þau hafa verið að horfa á frá því þau voru börn,“ segir Björk og bætir við að lokum:

„Ég er mjög montin af þessari leiksýningu og held ég sé að senda mjög falleg skilaboð til unglinga um að þau hafi frelsi til að elska þann sem þau vilja.“