Skórnir sem slegið hafa í gegn

Nike hefur lagt mikla áherslu á Nike Free Run síðastliðin ár. Skórnir eru afar sveigjanlegir, mjúkir og fisléttir. „Það sem greinir Nike Free Run frá öðrum hlaupa- og æfingaskóm er sú staðreynd að í þeim eru það fæturnir sem stýra því hvernig niðurstigið verður en ekki skórnir. Skórnir eru sérstaklega hannaðir til þess að fæturnir geti hreyfst á frjálsan og náttúrulegan hátt,“ segir Elfa Arnardóttir, markaðsstjóri smásölusviðs Icepharma, sem er umboðsaðili Nike á Íslandi.

Fæturnir styrkjast

Í Nike Free skóm er ekki byggt á eiginlegum stuðningi hringinn í kring eins og fólk á kannski að venjast heldur er tæknin hugsuð þannig að með tímanum örvi þeir litlu vöðvana í fótunum sem gerir það að verkum að fóturinn styrkist.

„Hlauparar þurfa hins vegar að gefa skónum tíma því að álagið á rist, hæl og il verður meira en þeir eiga að venjast. Ávinningurinn er sterkari fætur,“ segir Elfa.

Free Run-skórnir eru allir hugsaðir sem hlaupa- og æfingaskór. „Við mælum hins vegar ekki með því að fólk sé að hlaupa mikið meira en tíu kílómetra í þeim í einu enda eru þeir sem fyrr segir ekki styrktir. Þeir eru hins vegar mjög slitsterkir. Elsta parið mitt er þriggja ára og ég geng enn þá í þeim,“ upplýsir Elfa.

Flottir við gallabuxur

Hún mælir eindregið með Nike Free Run-skóm fyrir fólk sem stundar alla almenna líkamsrækt svo sem krossfit, bootcamp, pallatíma og dans. Eins í skokk og gönguferðir.

„Það besta við Nike Free Run-skó er þó það að þeir eru ótrúlega fallegir á fæti og eru margir sem nota þá við gallabuxur og jafnvel fínni klæðnað. Þetta er í fyrsta skipti í lengri tíma sem það þykir flott að vera í hlaupaskóm við gallabuxur og það gleður okkur mikið,“ segir Elfa.

Þrjár gerðir

Nike Free Run-skór koma í þremur útgáfum og er litaúrvalið að sögn Elfu endalaust.

„Um er að ræða Nike Free 3.0, 4.0 og 5.0. Munurinn liggur í þykkt og sveigjanleika botnanna. 3.0 er nettastur á fæti en hann hefur líka þynnsta botninn. Hann er sömuleiðis sveigjanlegastur og er hægt að beygja skóinn í heilan hring. Hann er ekki með lausa tungu og minnir svolítið á sokk að því leyti að eigandinn smeygir sér ofan í hann. 5.0 er með þykkasta botninn sem þýðir að hann er mýkstur en hefur um leið minnsta sveigjanleikann. Hægt er að beygja hann í um það bil hálfan hring og tungan er laus eins og í venjulegum hlaupaskóm. 4.0 er svo millivegurinn. Tungan er föst öðrum megin en laus hinum megin. Skórinn er mitt á milli hinna tveggja í mýkt og sveigjanleika.

Elfa segir mikinn meðbyr með skónum og að konur sem karlar um heim allan noti þá við alls kyns tilefni. „Þeir eru notaðir við æfingar, til hversdagsnota og jafnvel á klúbbunum. Reynsla okkur hér heima er sú að því litríkari sem skórnir eru því hraðar rjúka þeir út. Þetta er að okkar mati æðisleg þróun og hvet ég alla til að næla sér í par og taka þátt í þessari þægilegu tískubylgju með okkur enda þvílíkur munur að fara úr hælum yfir í einstaklega létta skó þar sem tilfinningin er nánast eins og að ganga á tánum.“

Tilboð á morgun

Á morgun, sumardaginn fyrsta, mun Nike í samstarfi við Intersport bjóða allar gerðir af Nike Free Run skóm á aðeins 19.990 krónur. „Við vorum að taka upp heilan helling af nýjum skóm í hinum ýmsu litum og því um að gera að líta við,” segir Elfa. Tilboðið gildir bæði í Intersport í Lindum og á Höfða.