Nýtt gæða­kerfi Michelin Expert center hjá N1

N1 hefur um árabil starfað samkvæmt gæðakerfum Michelin og mun áfram fylgja þeim kröfum og stöðlum sem Michelin setur hverju sinni. Michelin Expert Center tekur við af alþjóðlega gæðakerfinu Michelin Quality Dealer, sem nú hefur verið lagt niður.

„Markmiðið með innleiðingu gæðakerfisins er að tryggja að N1 uppfylli allar kröfur Michelin um faglega þjónustu, ráðgjöf, vandað vöruframboð og háan gæðastaðal á hjólbarðaverkstæðum félagsins,“ segir Sigríður Ósk Indriðadóttir, vöruflokkastjóri hjólbarða hjá N1.

Hún segir mikla áherslu lagða á að sú vinna sem lá að baki Quality Dealer fyrirkomulaginu og þeir gæðastaðlar sem byggðir höfðu verið upp glatist ekki.

„Michelin gerir ríkar kröfur til samstarfsaðila sinna og N1 leggur áherslu á að fylgja þeim gæðastöðlum sem Michelin setur hverju sinni. Hugmyndafræðin á bak við Expert Center frá Michelin er að gæði felist ekki eingöngu í því hvaða dekk eru undir bílnum, heldur einnig í ráðgjöfinni sem viðskiptavinurinn fær, þekkingu starfsfólks, vinnubrögðum á verkstæðinu og þeim búnaði og ferlum sem notaðir eru við þjónustuna,“ segir Sigríður Ósk.

Áhersla er lögð á að viðskiptavinir hafi aðgang að vönduðu úrvali hjólbarða og fái faglega ráðgjöf við að velja réttu dekkin fyrir ökutækið, notkunina og íslenskar aðstæður. Jafnframt eru gerðar ríkar kröfur til þeirra verkstæða sem falla undir Expert Center. Þar skipta fagleg vinnubrögð, þekking starfsmanna, ástand búnaðar, verklag og almenn gæði þjónustunnar miklu máli.

„Viðskiptavinurinn getur treyst á að fagmennska og gæði séu í fyrirrúmi hvort sem um er að ræða val á hjólbörðum, ráðgjöf eða þjónustu á verkstæði.“

Með nýja samstarfinu heldur N1 áfram þeirri vegferð sem hófst með Quality Dealer, en tekur hana jafnframt skrefinu lengra. Expert Center verður þannig sýnilegur gæðastimpill fyrir þá viðskiptavini sem vilja vandaða vöru, faglega ráðgjöf og fyrsta flokks hjólbarðaþjónustu.