Erfiður tími fyrir mig persónulega

Rakel Hönnudóttir, leikmaður Breiðabliks, mætir sínum gömlu félögum í Þór/KA í úrslitum Borgunarbikars kvenna í knattspyrnu. Rakel er uppalin fyrir norðan og lék lengi vel með Þór/KA.

„Þessi leikur leggst mjög vel í mig, enda hef ég aldrei farið áður í bikarúrslit,“ segir Rakel Hönnudóttir, leikmaður Breiðabliks, í samtali við Fréttablaðið.

„Þetta verður eflaust nokkuð sérstakt fyrir mig þar sem ég er uppalinn á Akureyri og hef spilað nánast allan minn feril með andstæðingnum.“

Rakel yfirgaf Þór/KA fyrir síðasta tímabil og færði sig yfir til Blika. Þór/KA kom síðan á óvart og varð Íslandsmeistari á síðustu leiktíð.

„Það var ekkert sérstaklega gaman að horfa á mína gömlu samherja hampa Íslandsmeistaratitlinum og það var í raun mjög erfiður tími fyrir mig persónulega. Ég stend samt sem áður á því að þetta hafi verið rétt ákvörðun fyrir mig og minn feril sem knattspyrnumann.“

Leikurinn fer fram á Laugardalsvelli klukkan fjögur í dag.

„Það að þessi leikur sé gegn mínum gömlu félögum gerir mig enn hungraðri til að vinna þennan titil. Liðið er vel undirbúið og leikmenn verulega spenntir fyrir leiknum.“