Rík þörf fyrir skólann

Fjörutíu ár eru liðin frá því Söngskólinn í Reykjavík var stofnaður. Síðan þá hefur hann alið af sér á fjórða þúsund söngvara. Garðar Cortes hefur verið skólastjóri frá byrjun.

„Við byrjuðum daginn með morgunverði klukkan átta sem við buðum öllum nemendum og kennurum í, bæði núverandi og fyrrverandi. Líka borgarfulltrúum, styrktarfélögum, vildarvinum, tónlistarmönnum og menningarfrömuðum,“ segir Garðar Cortes, óperusöngvari og skólastjóri Söngskólans í Reykjavík, spurður út í hátíðahöld í tilefni fertugsafmælis skólans.

Hann segir hefðbundna kennslu verða eins og venjulega í dag, enda sé fimmtudagur ásetnasti dagur vikunnar.



Hátt á fjórða þúsund nemendur hafa útskrifast frá Söngskólanum í Reykjavík á þessum fjórum áratugum og Garðar segir stóran hluta þess hóps vinna við fagið.

„Það var rík þörf fyrir skólann því áður þurftu allir að sækja söngmenntun til útlanda,“ segir Garðar, sem kom skólanum á fót.“

Hann segir fólk hafa flykkst í skólann, margt á þrítugsaldri og þaðan af eldra, virkilegt söngfólk sem kom úr kórum og þráði að fá að læra. Sama máli gilti um kennarana sem ráðnir voru, þeir voru margir stórsöngvarar sem höfðu verið að kenna heima áður.

Nú eru 32 starfsmenn við skólann.



Söngskólinn í Reykjavík hefur starfrækt háskóladeild frá árinu 1977 og hafa 252 nemendur lokið prófum þaðan.