Svolítið eins og að spila með Bítlunum

Í nóvember er væntanlegt úrval ljósmynda Ragnars Axelssonar í ritröðinni Photo Poche, sem álitin er áhrifamesta ritröð um  sögu ljósmyndunar í heiminum.

„Ég er voða rólegur yfir þessu, en get auðvitað ekki annað en verið stoltur yfir þessu vali þeirra,“ segir Ragnar Axelsson ljósmyndari, spurður hvernig tilfinning það sé að vera settur á stall með bestu ljósmyndurum sögunnar. „Ég held að þessi bókaflokkur sé mest seldu ljósmyndabækur í heiminum,“ segir Ragnar.



Í nóvember er væntanlegt úrval ljósmynda Ragnars Axelssonar í ritröðinni Photo Poche, sem álitin er áhrifamesta ritröð um sögu ljósmyndunar í heiminum. Um er að ræða bókaflokk sem hóf göngu sína í Frakklandi árið 1982 en hefur komið út á mörgum tungumálum, til að mynda á ensku hjá hinni þekktu bókaútgáfu Thames & Hudson. Ragnar er fjórði Norðurlandabúinn sem valinn er í ritröð Photo Poche, en fyrir eru úrvalsbækur með myndum Svíanna Anders Petersen og Christers Strömholm og höfuðljósmyndara Finna, Pentti Sammallahti.



Spurður hvort hann hafi haft eitthvað um val myndanna í bókinni að segja verður Ragnar hálfhneykslaður. „Nei, ég sendi þeim bara fullt af myndum og þeir sáu alfarið um valið. Þetta er svolítið eins og að spila með Bítlunum, þeir ráða auðvitað hvaða lag er spilað og maður er bara glaður að fá að vera með.“



Markmið ritraðarinnar Photo Poche er að taka saman í handhægum og ódýrum bókum verk helstu áhrifavalda ljósmyndasögunnar, jafnt frumkvöðla ljósmyndunar á nítjándu öld, sem þeirra ljósmyndara sem mótuðu miðilinn mest á þeirri tuttugustu. Á seinni árum hafa svo yngri ljósmyndarar bæst í hópinn sem taldir eru hafa með verkum sínum bætt nýjum víddum við sögu miðilsins og eflt ljósmyndina sem sérstakt tjáningarform. Með vali á ljósmyndurum í röðina er viðkomandi settur á stall sem einn af höfuðljósmyndurum sögunnar.



Hefur valið einhver áhrif á markaðssetningu á verkunum þínum? „Ég veit það ekki, undanfarið hefur beiðnum um sýningar erlendis fjölgað mjög mikið og núna eru fjórar sýningar á myndum eftir mig í gangi í Evrópu; tvær í Þýskalandi, ein í Póllandi og svo er ein í Svíþjóð. Ég er auðvitað óskaplega ánægður með það, en það er ansi mikil vinna sem fylgir svona sýningarhaldi. Sýningarnar í Þýskalandi og Póllandi fara síðan á flakk á næstu árum og svo er verið að spá og spekúlera í ýmsum hlutum í framhaldinu.“



Ragnar segir viðhorfið til ljósmyndunar allt annað erlendis en hér heima. „Reyndar finn ég mikinn hlýhug frá Íslendingum almennt, en í menningargeiranum er ljósmyndun ekki talin með. Það er þó aðeins farið að breytast og sú þróun heldur vonandi áfram.“

Bókaútgáfan Crymogea hefur samið við Actes Sud og Thames & Hudson um sérstaka útgáfu bókarinnar á ensku fyrir íslenskan markað og er það í fyrsta sinn sem slíkt leyfi er veitt.