Seat villiköttur

Volkswagen hefur mikinn hug á því að tefla fram Seat merki sínu í samkeppninni við Alfa Romeo bíla. Það getur reyndar reynst þrautin þyngri í samkeppninni við komandi 4C og 8C bíla Alfa. Ein tilraunin til þess er þó þessi Seat Leon Cupra bíll sem er öflugasti bíll sem Seat hefur nokkru sinni framleitt.

Hann er ekkert lamb að leika sér við með sín 276 hestöfl. Það afl kemur ekki frá stórri vél, heldur 2,0 lítra forþjöppudrifinni og háþrýstri vél. Bíllinn verður bæði í boði þriggja og fimm hurða og annað hvort með 6 gíra beinskiptingu eða sjálfskiptingu með tveimur kúplingum.

Hann á að vera aðeins 5,7 sekúndur í hundraðið og hámarkshraðann 250 km/klst. Margt úr þessum Seat bíl er upprunið í nýjum Volkswagen Golf R bíl sem er 300 hestafla tryllitæki. Seat Leon Cupra er nú sýndur á bílasýningunni í Detroit.