Valskonur töpuðu óvænt fyrir Haukum á heimavelli

Haukar virðast sjóðheitir þessa dagana en liðið gerði sér lítið fyrir og skellti stórliði Vals í Vodafone-höllinni í Olísdeild kvenna.

Þetta var fimmti sigur Hauka í röð í deild og bikar en liðið vann fjögurra marka sigur, 31-27, eftir að hafa verið tveimur mörkum yfir í hálfleik.

Haukar höfðu forystu nánast allan leikinn en Valur náði þó að jafna metin í síðari hálfleik. En Haukar náðu undirtökunum á ný og tryggðu sér sætan sigur.

Marija Gedroit skoraði ellefu mörk fyrir Hauka og Karen Helga Díönudóttir sex. Anna Úrsúla Guðmundsdóttir var markahæst í liði Vals með tíu mörk.

„Mínir leikmenn spiluðu frábæran varnarleik í dag og voru þar að auki afar skynsamir í sóknarleiknum,“ sagði Halldór Harri Kristjánsson, þjálfari Hauka, við Vísi eftir leik.

„Við vorum fyrst og fremst að einbeita okkur að okkar eigin frammistöðu. Við höfum verið að spila framliggjandi 3-2-1 vörn og hún hélt mjög vel í dag. Þær [Valskonur] áttu virkilega erfitt með að komast í gegnum okkur í dag.“

Haukar komust upp í fimmtán stig með sigrinum í dag en Valur er í öðru sæti með 24 stig. Haukar eru í sjötta sæti deildarinnar. „Nú gildir það eitt að vera áfram á tánum. Það verður annar efiður leikur næst,“ bætti Halldór Harri við en Haukar mæta Selfyssingum eftir viku.

Valur - Haukar 27-31 (14-16)

Mörk Vals: Anna Úrsúla Guðmundsdóttir 10, Rebekka Rut Skúladóttir 4, Hrafnhildur Ósk Skúladóttir 4, Karólína B. Lárudóttir 3, Aðalheiður Hreinsdóttir 3, Kristín Guðmundsdóttir 3.

Mörk Hauka: Marija Gedroit 11, Karen Helga Díönudóttir 6, Viktoría Valdimarsdóttir 4, Gunnhildur Pétursdóttir 4, Ragnheiður Ragnarsdóttir 3, Agnes Ósk Egilsdóttir 2, Ragnheiður Sveinsdóttir 1.