Allir bílar tali saman

Sú tækni er nú þegar til staðar að bílar sendi upplýsingar til nærliggjandi bíla til að afstýra hættu. Líklega er þess ekki langt að bíða að allir bílar verði svo búnir, en það er að minnsta kosti stefna Umferðaröryggisstofnunar Bandaríkjanna, NHTSA.

Með slíkum búnaði sendir hver bíll boð til nærliggjandi bíla í nokkur hundruð metra radíus og það tíu sinnum á sekúndu. Með þessu má vara bílstjóra við bílum sem sjást illa, t.d. handan horns þar sem hús er á milli. Einnig getur þessi búnaður varað ökumann við ef of nálægt er farið öðrum bílum eða of hratt nálgast hægfara eða kyrrstæða bíla.

Umferðaröryggisstofnunin segir að þessi búnaður geti komið í veg fyrir 70-80% allra umferðarslysa. Bent hefur verið á að sú tíðni sem sendar bílanna nota, 5,9 GHz, sé of nálaægt bylgjulengd WiFi-tengdra tölva og eigi það til að trufla þær. Framleiðendur eru í viðræðum við tölvuiðnaðinn svo leysa megi þetta bagalega vandamál.

Miklar prófanir hafa þegar verið gerðar á þessum sendibúnaði milli bíla og hefur hann reynst vel. Tengja má þennan búnað við stjórntæki hvers bíls og forða með því enn fleiri óhöppum, en þannig búnir eru bílar orðnir langt að því sjálfkeyrandi.