Audi S1 myndir leka

Audi ætlar að svifta hulunni af mjög öflugri útgáfu síns minnsta bíls, Audi A1 á næstu dögum og ber sá bíll nafnið Audi S1. Í leiðinni verður kynnt andlitslyfting á hefðbundna A1 bílnum.

Verða þessir tveir bílar svo kynntir almenningi á bílasýningunni í Genf í næsta mánuði. Audi S1 verður með 230 hestafla 2,0 lítra bensínvél með forþjöppu. Hann verður fjórhjóladrifinn og með val um 6 gíra beinskiptingu eða tveggja kúplinga sjálfskiptingu.

Þessi bíll er um margt líkur Volkswagen Golf GTI, með sömu vél, en er bara talsvert minni bíll. Audi hefur því ekki þurft að kosta miklu til við þróun þessa bíls og er það vitnis um hversu mikið Volkswagen stórfjölskyldan nýtir sama búnað milli bílgerða sinna og bílamerkja.