"Ég var búinn að safna skeggi í fjóra mánuði bara til að púlla týpuna“

Í myndskeiðinu hér að ofan má sjá Ingvar Örn Ákason 29 ára stuðningsfulltrúa frá Ísafirði sem komst áfram með stórskemmtilegt uppistand í sjónvarpsþættinum Ísland Got Talent á sunnudagskvöldið. Við heyrðum í Ingvari, fengum að fletta í gegnum myndaalbúmið hans og komumst að því að hann er bráðskemmtilegur.

Hvað starfar þú við?  „Ég er stuðningsfulltrúi í Grunnskólanum á Ísafirði. Ég vinn þar frá klukkan 8 til 14. Ég er með strák í 10. bekk og ég aðstoða hann við námið en á daginn þjálfa ég hjá handknattleiksfélagi Harðar en það eru 70 iðkendur hjá mér. Þetta er fjórða árið mitt og mikil stemning og uppgangur,“ svarar Ingvar eða Byssi (stytting á Byssan) eins og hann er oft kallaður i daglegu lífi.

Hvernig er stuðningurinn fyrir vestan eftir frammistöðuna á sunnudaginn? „Hann er mjög góður. Það er mjög vel tekið í þetta. Krakkarnir í grunnskólanum sérstaklega og þeir sem ég er að þjálfa. Já, já allt að gerast. Systir mín var spennt og tveggja ára guðsonur minn líka hann öskrar á skjáinn þegar systir mín sýnir honum videoið. Hann kallar mig „Ididi“ en ekki Ingvar en hann þekkir sinn mann,“ svarar Ingvar.

Spurður um undirbúning fyrir framhaldið í Ísland Got Talent svarar Ingvar: „Það gengur bara vel. Ég er alltaf með uppistandspælingar og pæli mikið í lífinu og tilverunni. Ég er alltaf viðbúinn og tilbúinn þegar kemur að uppistandi. Ég sinni veislustjórn og hef verið að skemmta á konukvöldum, verið kynnir á jólahlaðborði og Ungfrú Vestfirðir og fleira. Þetta er það skemmtilegasta sem ég geri.“

Hey góður Valdimarbrandarinn!

Fannst þér tíminn ekkert of stuttur sem þú fékkst á sunnudaginn til að láta ljós þitt skína? „Jú en það voru bara sýndar 40 sekúndur úr sjálfu uppistandinu. Það var bara tæplega helmingurinn sýndur. Það var komið inn í mitt atriði og byrjað þar en svo var komið inn á fræga Valdimarkaflann en ég er búinn að fá mikil viðbrögð við honum. Margir hafa sagt við mig: „Hey góður Valdimarbrandarinn!“. Ég var búinn að safna skeggi í fjóra mánuði bara til að púlla týpuna,“ útskýrir Ingvar.

Svo sá ég stálið í agunum hans

Þú lagðir mikla áherslu á að kæta Bubba? „Já, ástæðan fyrir því að ég vildi fá hlátur eða bros frá honum var af því að ég keppti í Idolinu árið 2004 og tók þátt í gríni með lagið Vöðvastæltur með Landi og sonum með tilheyrandi dansi og stuði. Þar var ég með Gibbon-skopparabolta með mér í prufunni og Bubba fannst það alveg núll fyndið. Honum stökk ekki bros. Hann spurði: „Ætlarðu að skoppa þessum bolta eða syngja?“ - og ég svaraði brosandi: „Ég var að spá í að gera bæði.“ Svo sá ég stálið í augunum hans og varð skíthræddur, og sagði við hann skömmustulega: „Ætli ég syngi ekki bara.“

Og komstu áfram í Idolinu? „Nei hann var alls ekki að fila strákinn.“

Ertu lofaður? „Nei ég er laus og liðugur. Ég er einhleypur hress piltur,“ svarar hann kátur yfir spurningunni.