Volvo með KERS

Þessi Volvo S60 bíll lítur út eins og hver annar Volvo, en svo er þó ekki. Hann er útbúinn sömu KERS-tækni og er um borð í mörgum Formúlu 1 bílum síðustu ára.

KERS stendur fyrir „Kinetic Energy Recovery System“ og er búnaður sem endurheimtir orku við hemlun með kasthjóli. Kasthjólið snýst ógnarhratt, eða á um 60.000 snúningum á mínútu og afl þess má sækja beint inná drifrásina eða varðveita með rafhlöðum til seinni notkunar.

 

KERS búnaður er í rándýrum ofurbílum eins og Porsche 918 Spyder, McLaren P1 og Ferrari LaFerrari, auk Formúlu 1 bíla, en hefur ekki enn sést í fjöldaframleiddum bílum á viðráðanlegu verði. Því ætlar Volvo að breyta og hyggst setja á markað bíla með KERS búnaði árið 2017. Önnur bílafyrirtæki eru einnig að vinna af framleiðslu á bílum með KERS tækni, svo sem Jaguar og Lotus og ef til vill fleiri. 

Sá Volvo S60 bíll sem hér sést er með 254 hestafla vél með forþjöppu og allt afl hennar er sent til framhjólanna, en aflið frá KERS búnaði hans fer til afturhjólanna. Svona bíll án KERS búnaðar er 7,68 í hundraðið en með KERS er hann aðeins 6,07 sekúndur. 

Afl kasthjólsins má endurheimta í 10 sekúndur samfleytt og bætast þá 80 hestöfl við það afl sem frá vél bílsins kemur. Volvo segir að með KERS búnaði eyði þessi S60 bíll 25% minna eldsneyti.