Fyrstu Saab tvinnbílarnir af færibandinu

Þegar kínverskir fjárfestar kræktu í sænska bílaframleiðandann Saab var það gert í því skyni að gera Saab að rafmagnsbílum. Meiningin var að smíða áfram Saab 9-3 Aero Sedan bílinn og knýja hann áfram með rafmagni. Fyrstu 200 nýju eintökin af bílnum eru nú í smíðum sem tvinnbílar. Þeir komast fyrstu 200 kílómetrana á rafmagni.  

Eftir fyrri yfirlýsingar nýrra eigenda Saab, NEVS (National Electric Vehicles Sweden) um að breyta bílnum í rafmagnsbíl, hefur það vakið furðu sumra að hann er nú orðinn tvinnbíll. Þó eru fáir tvinnbílar sem komast lengra á rafmagninu einu saman en þessi bíll.

Enn aðrir hafa áhyggjur af því að Saab 9-3 bíllinn þyki gamaldags, enda er hann orðinn 12 ára gamall bíll og langt frá því framúrstefnulegur, en ber þó klassíska hönnun.

Nýi tvinnbíllinn er með 220 hestafla drifrás og er fjögurra strokka bensínvél í bílnum auk rafmagnsmótora. Fyrstu 200 bílarnir fara á markað í Kína, en þó einhver eintök til valdra aðila í Svíþjóð. Það er þó vonandi fyrir Saab aðdáendur að bílar Saab verði boði fyrir almenning, en nú eru liðin tvö og hálft ár síðan verksmiðjur Saab í Trollhättan lokuðu vegna gjaldþrots.