CCP gefur Reykjavíkurborg listaverk

Miðvikudaginn 30. apríl, daginn áður en EVE Fanfest hátíð og ráðstefna tölvuleikjaframleiðandans CCP hefst í Reykjavík, verður hulunni svipt af nýju listaverki Sigurðar Guðmundssonar við höfnina. Verkið mun vera gjöf CCP til Reykjavíkurborgar.

Fram kemur í tilkynningu frá CCP að listaverkið beri nafnið Heimar í heimi (e: World Within Worlds) og sé virðingarvottur til þeirra milljóna manna um alla heimsbyggðina sem tekið hafa þátt í þróun og uppbyggingu EVE heimsins, allt frá sköpun hans fyrir um áratug.

„Heimurinn samanstendur í dag af um 67.000 plánetum, rúmlega 340.000 tunglum og 7.929 sólkerfum – auk hundruðir þúsunda borgara, m.a. yfir 500.000 spilara fjölspilunarleiksins EVE Online. Innan þessa gríðarstóra sýndarveruleika, þar sem eigið hagkerfi þrífst, gerast atburðir dag hvern sem hafa áhrif á hundruðir þúsunda manna í öllum heimsálfum,“ segir í tilkynningu CCP.

Heimar í heimi verður staðsett á hafnarkantinum við Rastargötu í Vesturbugt. Þar mun verkið standa a.m.k. til 1. maí 2016 þegar ákvörðun verður tekið með endanlega staðsetningu þess. Verkið er unnið í Kína í granít, stál, steypu og ál og verður fimm metra hátt. Nöfn hundruða þúsunda spilara EVE Online eru rituð í álplötur sem þekja grunn verksins.

Borgarstjóri Reykjavík mun veita verkinu viðtöku fyrir hönd borgarinnar. Viðstaddir afhjúpunina verða jafnframt Sigurður Guðmundsson listamaður verksins, Hilmar Veigar Pétursson framkvæmdastjóri CCP og fulltrúar Council of Stellar Management (CSM) sem er lýðræðislega kjörið ráð spilara EVE Online sem hafa áhrif á þróun leiksins. Rúmlega 90 erlendir blaðamenn eru væntanlegir á EVE Fanfest hátíðina og verða margir þeirra komnir til landsins til að verða vitni af afhjúpun verksins.

„Við viljum varðveita og heiðra framlag þeirra milljóna manna sem hafa tekið þátt í uppbyggingu og framþróun EVE heimsins síðustu 10 ár,“ segir Hilmar Veigar Pétursson, framkvæmdastjóri CCP.

„Við erum þakklát fyrir það traust sem okkur hefur verið sýnt öll þessi ár og vonumst til að verkið, líkt og EVE Online, muni standast tímans tönn og endast framyfir okkar ævidaga. Verkið er jafnframt þakklætisvottur til Reykjavíkur sem hefur verið heimili okkar síðustu 16 ár, og íbúa borgarinnar sem hafa hjálpað okkur með svo margt í gegnum árin.

Hilmar segir að gestrisni Reykvíkinga í kringum EVE Fanfest hafi reynst mikilvæg.

„Það var hér í Reykjavík sem við hófum þróun á EVE Online árið 1997 og um helgina fögnum við tíu ára afmæli EVE Fanfest í borginni.“

„Verkið er þegar farið að vekja athygli á erlendum vettvangi, m.a. í erlendum fjölmiðlum, enda ekki á hverjum degi sem listaverk með aðra eins skírskotun rís í heiminum,“ segir Eldar Ástþórsson, upplýsingafulltrúi CCP.

„Það ríkir mikil eftirvænting meðal gesta Fanfest hátíðarinnar við að sjá verkið og spilarar EVE Online um heim allan hafa sýnt því mikinn áhuga.“

Eldar segir að búast megi við því að spilarar EVE Online og áhugafólk um tölvuleiki almennt leggi leið sína að verkinu þegar það heimsækir landið.

„Í dag fáum við töluvert af gestum á skrifstofu okkar í Reykjavík sem við getum í raun lítið sem ekkert gert fyrir. Verkið verður vonandi athyglisverðar staður fyrir þessa gesti að heimsækja og mun vonandi vekja frekari athygli á Reykjavík og Íslandi sem áfangastað.“