Toyota GT86 með blæju

Finnur Thorlacius skrifar 6. júní 2014 10:30

Toyota GT86 sem einnig er framleiddur sem Subaru BRZ mun fást topplaus frá og með október í ár. Subaru hefur reyndar engan áhuga á að bjóða bílinn með blæju og því verður það einungis Toyota GT86 sem fást mun þannig.

Þannig útbúinn sást þessi sportbíll fyrst á bílasýningunni í Genf í fyrra, en nú er hann loks að verða að veruleika. Blæjuútgáfa bílsins verður áfram með 200 hestafla boxer vélinni sem kemur úr smiðju Subaru. Margir hafa þrýst á Subaru og Toyota að bjóða þenna skemmtilega bíl með öflugri vélum og þeir hinir sömu virðast hafa verið bænheyrðir því 300 hestafla vél mun brátt bjóðast, líklega með forþjöppu. Sá bíll fær 8 gíra sjálfskiptingu.

Einnig ætlar Toyota og Subaru að bjóða bílinn sem tvinnbíl og verður sá bíll fjórhjóladrifinn og framhjólin drifin áfram með rafmótorum. Í Bandaríkjunum kostar Toyota GT86/Subaru BRZ 25.800 dollara, en blæjuútgáfan verður líklega á verðbilinu 35-38.000 dollarar.

Búist er við því að 300 hestafla útgáfa bílsins muni kosta um 35.000 dollara, en það útleggst á 3,9 milljónir króna. Tvinnbílsútgáfa hans með fjórhjóladrifi verður hinsvegar á um 50.000 dollara. Það ber því talsvert mikið á milli verðs á núverandi útgáfu bílsins og þessara nýju gerða hans.