Bottas: Williams verður áfram í baráttunni 2015

Valtteri Bottas, ökumaður Williams liðsins í Formúlu 1 segist sannfærður um að góður árangur liðsins að undanförnu muni halda áfram á næsta ári.

Williams liðið hefur komið gríðarlega á óvart á tímabilinu. Á tímabilinu 2013 náðu Bottas og Pastor Maldonado einungis í fimm sitg samtals og liðið endaði í níunda sæti í keppni bílasmiða.

Núna þegar tímabilið er rúmlega hálfnað situr Williams í fjórða sæti í keppni bílasmiða með 135 stig. Ferrari er í þriðja sæti með einungis sjö stiga forskot.

„Við erum í góðum málum því við vitum að bíllinn okkar er í grunninn mjög góður. Það hefur verið gott að breyta honum og bæta og nú verðum við bara að halda þróuninni áfram,“ sagði Bottas og Williamsbílinn.

Bottas segir að helsti munurinn á þessu tímabili og því síðasta sé sá að uppfærslur á bílnum í fyrra virkuðu ekki en í ár séu þær að skila tilætluðum árangri.

„Tengingin á milli loftflæðigangnanna og brautanna hefur verið miklu betri. Það hefur meiri orka farið í að endurskipuleggja starfsemina í verksmiðjunni og loftflæðigöngin hafa verið fínstillt og þá smellur þetta saman,“ sagði Bottas sem eygir fyrsta sætið í næstu tvemur keppnum.