Mikil óvissa hefur verið með þátttöku Tiger Woods á PGA-meistaramótinu sem fram fer á Valhalla-vellinum og hefst í dag. Woods þurfti að hætta leik á lokahring Bridgestone Invitational í síðustu viku vegna verkja í baki en hann er, eins og flestir golfáhugamenn vita, nýkominn úr löngu fríi vegna aðgerðar sem hann fór í á baki.
Það leit alls ekki út fyrir að hann yrði með á þessu síðasta risamóti ársins en þegar hann hætti leik síðasta sunnudag virtist hann vera mjög þjáður.
Það kom því töluvert á óvart þegar þær fréttir bárust í gær að Woods myndi leika æfingahring fyrir mótið og eftir hringinn staðfesti hann svo þátttöku sína.
„Ég hef unnið mikið með sjúkraþjálfaranum mínum undanfarna viku og ég finn ekki fyrir neinum sársauka eins og er,“ sagði Woods við fréttamenn eftir æfingahringinn í gær. „Ef bakið fer að vera með leiðindi þá verður hann með mér alla vikuna og ætti að geta hjálpað mér að klára mótið.“
Spurður út í væntingar fyrir mótið eftir undanfarna erfileika var svar þessa vinsæla kylfings stutt. „Ég ætla mér að vinna þetta.“
PGA-meistaramótið verður í beinni útsendingu á Golfstöðinni alla helgina og hefst útsending frá fyrsta hring klukkan 17:00.
Tiger Woods staðfestir þátttöku sína á PGA-meistaramótinu
