Ætlar McLaren að yngja upp?

McLaren liðið vinnur nú að þriggja til fimm ára ökumanna áætlun. Hvorugur ökumaður liðsins hefur heyrt hvort hann er inni í þeirri áætlun.

Framtíð Jenson Button og Kevin Magnussen er því enn óörugg. Samningar þeirra beggja eru til loka yfirstandandi tímabils. Ron Dennis, sem tók aftur við stjórnartaumum liðsins fyrir tímabilið vill koma á langtímaáætlun.

Button sem kom til liðsins 2010 viðurkenndi um helgina að aðstæðurnar sem hann er í væru óvenjulegar. Eric Boullier, keppnisstjóri McLaren hefur óskað þess af ökumönnum að þeir haldi ró sinni þrátt fyrir allt.

„Það er sennilega óvenjulegt að ágúst sé að ljúka og liðið hefur ekki staðfest neitt. Við erum að vinna að áætlun sem snýst um ökumenn næstu ára. Fyrir mér er mikilvægt að segja ára í fleirtölu þvi við erum að skipuleggja þrjú næstu ár og hugsanlega fimm,“ sagði Buollier.

Boullier viðurkenndi líka að liðið hefði ekki fært ökumönnum sínum nægilega góðan bíl í ár og bætti við að bæði Button og Magnussen séu að standa sig mjög vel.

Til að bæta gráu ofan á svarta óvissuna sagði Boullier að hugsanlega sé Stoffel Vandoorne, þróunarökumaður McLaren tilbúinn til að taka sæti í liðinu.

Vandoorne fékk tækifæri á æfingum á Silverstone brautinni nýlega og þótti standa sig vel. Hann vann sína fyrstu GP2 keppni og hefur síðan þá náði í þónokkuð af verðlaunum.

Hugsanlega sér McLaren aldur Buttons sem galla, hugsanlega mun liðið sparka 34 ára heimsmeistaranum frá 2009 eftir tímabilið. Það gæti þó orðið að Button fái annan nýliða sem liðsfélaga og Magnussen fái sparkið.