McGinley: Erfitt að skilja Donald eftir heima

Paul McGinley, fyrirliði Evrópu í Ryder-bikarnum í ár, tilkynnti í dag evrópska liðið og um leið þá þrjá kylfinga sem hann valdi með fyrirliðavalréttinum.

McGinley valdi Englendingana Lee Westwood, sem hefur verið að spila mun betur upp á síðkastið, og IanPoulter auk Skotans StephensGallachers sem er nýliði.

Gallacher hafnaði í þriðja sæti á opna ítalska meistaramótinu um helgina sem McGinley sagði á blaðamannafundi í dag hafa farið langt með að tryggja honum sætið.

Gallacher hefði hirt síðasta sjálfkrafa sætið í evrópska liðinu af Norður-Íranum GraemeMcDowell hefði hann náð öðru sæti á mótinu og því fannst fyrirliðanum hann eiga það skilið að þreyta frumraun sína að þessu sinni.

Þetta allt saman þýddi að McGinley þurfti að skilja Englendinginn LukeDonald eftir heima, en hann hefur verið einn besti kylfingurinn í Ryder-bikarnum undanfarin ár.

Donald var í sigurliði Evrópu á Medinha-vellinum fyrir tveimur árum og hefur unnið 10,5 stig af 15 mögulegum síðan hann tók fyrst þátt árið 2004.

Donald hefur aftur á móti átt skelfilegt ár og aðeins hafnað á meðal 35 efstu einu sinni á síðustu níu mótum sem hann hefur tekið þátt í.

„Þetta var mjög erfið ákvörðun fyrir margra hluta sakir,“ sagði McGinley um ástæðu þess að hann valdi ekki Donald í liðið.

„Samband mitt við Luke er mjög náið. Hann hefur spilað í öllum Ryder-bikurum sem ég hef tekið þátt í nema árið 2008 þegar við vorum hvorugir með. Við vorum saman í liði bæði 20024 og 2006 og ég var svo varafyrirliði liðsnis 2010 og 2012.“

„Árangur hans í Ryder-bikarnum talar fyrir sig sjálfur og ég velkist ekki í vafa um að hann eigi eftir að keppa oft í honum. Þetta var erfið ákvörðun, en ég varð að taka hana með velferð evrópska liðsins í huga,“ sagði Paul McGinley.

Ryder-bikarinn fer fram á Gleneagles-vellinum í Skotlandi 26.-28. september og verður í beinni útsendingu á Golfstöðinni.