Prodromou kominn aftur til McLaren

Peter Prodromou hefur snúið aftur til starfa hjá McLaren eftir átta ár í herbúðum Red Bull. Þar starfaði hann við hlið hönnunargúrúsins Adrian Newey.

Promdromou átti stóran þátt í velgengni Red Bull eftir að hann fór frá McLaren liðinu árið 2006. Hann fór þá til Red Bull og hefur svo snúið aftur núna. Samningur um framtíð hans hjá McLaren var í höfn í fyrra en Red Bull vildi halda Prodromou út samningstímann. Hann er mikill fengur fyrir McLaren.

Prodromou lofar að gera allt sem í hans valdi stendur til að tryggja að McLaren bíll næsta árs verði stöðugt í baráttu meðal þeirra fremstu.

„Það er frábært að koma aftur til McLaren, og sjá blöndu af nýjum og gömlum andlitum. Auðvitað, þekki ég ástríðuna og einbeitingu þessa magnaða liðs, við höfum þegar séð metnaðinn og jákvæðnina sem býr í liðinu til að koma McLaren aftur í stöðu til að vinna titla,“ sagði Prodromou ákveðinn.

„Ég er ákveðinn í að gefa mig allan til að hjálpa liðinu að hefja nýjan kafla sem einkennist af bættum árangri,“ sagði Prodromou.

„Ráðning Peter er hluti af stórri áætlun. Við erum ekki að ljúga að sjálfum okkur um að nú sé allt klappað og klárt, en ráðning hans er gríðarlega stór þáttur í áætluninni, einnig minnir hún fólk utan liðsins á að við erum ávallt að styrkjast,“ sagði Jonathan Neale, verkefnastjóri McLaren.