UFC 178: Conor McGregor berst í kvöld

Einn umtalaðasti bardagamaður UFC í dag, Íslandsvinurinn Conor McGregor, mætir Dustin Poirier í rosalegum bardaga á UFC 178 í kvöld.

Fimm frábærir bardagar eru á dagskrá á Stöð 2 Sport í kvöld. Þrátt fyrir að barist sé um fluguvigtartitilinn í aðalbardaga kvöldsins fellur sá bardagi í skuggann á bardaga McGregor og Poirier.

Conor McGregor er eitt umtalaðasta nafnið í MMA í dag þrátt fyrir að hafa aðeins þrisvar barist í UFC. Kjaftbrúkur hans og hæfileikar í búrinu hafa skotið honum hratt upp á sjónarsviðið í UFC.

Í aðeins hans þriðja UFC bardaga var hann í aðalbardaga kvöldsins, nokkuð sem er fáheyrt innan raða UFC. Á bardagakvöldinu var hann aðal stjarnan enda fór bardagakvöldið fram í heimabæ hans, Dublin Írlandi. Okkar maður, Gunnar Nelson, barðist á sama kvöldi er hann sigraði Zak Cummings eftir hengingu.

Þrátt fyrir að bardagi helgarinnar sé þriðji síðasti bardagi kvöldsins er eins og bardagaaðdáendur séu lang spenntastir fyrir þessum bardaga. Til marks um það hafa um 231.000 manns horft á upphitunarþátt UFC fyrir bardaga McGregor og Poirier á meðan upphitunarþátturinn fyrir titilbardaga kvöldsins (aðalbardaginn) er með um 100.000 áhorf.

Conor McGregor mætir Bandaríkjamanninum Dustin Poirier (í 5. sæti á styrkleikalista UFC) og verður þetta erfiðasti bardagi Írans hingað til. Efasemdarmenn eru ekki enn sannfærðir um ágæti McGregor og telja að Poirier eigi eftir að sýna fram á að McGregor sé ekkert nema kjafturinn.

Það er enginn kærleikur á milli McGregor og Poirier eins og sást á blaðamannafundinum á fimmtudaginn og í vigtuninni í gær. Poirier lét hafa eftir sér að hann hafi aldrei hatað aðra manneskju jafn mikið og McGregor. Á sama tíma er McGregor slétt sama um Poirier. Markmið McGregor er að komast í hausinn á andstæðingum sínum og það virðist hafa tekist.

Frægðarsól McGregor hefur risið hratt og virðist hann vera í miklum metum hjá UFC. Dana White, forseti UFC, lét hafa eftir sér að McGregor væri með allt til að verða risa stjarna í íþróttinni. Í nýlegu myndbandi frá UFC var McGregor að snæða kvöldverð á hótelsvítu Dana White ásamt fylgdarliði. Það er ekki hver sem er sem fær svona meðferð, hvað þá eftir aðeins þrjá UFC bardaga.

Aðdáendur ýmist elska að hata hann eða dýrka hann og dá. Það er formúla sem gefur vel í aðra hönd fyrir UFC. UFC getur reiknað með því að fólk vilji horfa á McGregor sigra eða til að sjá McGregor fá þá flengingu sem margir telja hann eiga skilið.

Aðdáendur rífast um hvort McGregor geti farið alla leið eða ekki. Tíminn verður að leiða það í ljós en bardaginn í kvöld ætti að gefa góð fyrirheit fyrir framtíð hans í íþróttinni.

UFC 178 bardagakvöldið hefst kl 2 aðfaranótt sunnudags á Stöð 2 Sport. Bardagar kvöldsins eru:

Titilbardagi í fluguvigt - Demetrious Johnson gegn Chris Cariaso

Léttvigt: Donald Cerrone gegn Eddie Alvarez

Fjaðurvigt: Conor McGregor gegn Dustin Poirier

Millivigt: Tim Kennedy gegn Yoel Romero

Bantamvigt kvenna: Cat Zingano gegn Amanda Nunes