Bílar

Nýr XIV jepplingur frá SsangYong

Finnur Thorlacius skrifar
SsangYong XIV Adventure.
SsangYong XIV Adventure.
S-kóreski bílaframleiðandinn SsangYong er á heilmiklu flugi og á bílasýningunni í París sem nú stendur yfir kynnti fyrirtækið glænýjan bíl, jepplinginn XIV. Hann mun fást í tveimur útfærslum, XIV-Air og XIV-Adventure. Bíllinn hefur verið í þróun frá árinu 2011 en er nú kominn í sína endanlegu útfærslu.

Svo virðist sem SsangYong hafi tekist vel til með útlit jepplingsins. Hann fer í sölu í heimalandinu snemma á næsta ári og kemur til Evrópu einhverjum mánuðum seinna, meðal annars til Íslands, en Bílabúð Benna hefur nú hafið sölu á SsangYong bílum eftir nokkurra ára fjarvera þeirra hérlendis.

XIV er með 1,6 lítra bensín- eða dísilvél, en ekki hefur verið gefið upp hversu öflugar þær eru. Bílinn má fá með 6 gíra beinskiptingu eða sjálfskiptingu. Eitt af skemmtilegum einkennum á Adventure útfærslu XIV bílsins eru hnausþykkar hvítar leðurólar sem liggja utan á afturhlera bílsins. Eru þær sem afturhvarf til fortíðar gamalla lúxusbíla þar sem afturhlerar voru spenntir niður með leðurólum. Kemur þetta mjög vel út á XIV-bílnum og ljáir honum sérstöðu.

SsangYong er fjórði stærsti bílaframleiðandi í S-Kóreu og fagnar í ár 60 ára starfsafmæli sínu.

Mest lesið




×

Mest lesið