Volvo skapar 1.300 ný störf í Gautaborg

Volvo er að stækka verksmiðjur sýnar í Torslanda í nágrenni Gautaborgar í Svíþjóð til að mæta eftirspurn eftir nýjum bílum sínum. Meðal annars mun  Volvo bæta við þriðju vaktinni í verksmiðjunum auk þess að stækka þær verulega. Því verður unnið að smíði Volvo bíla allan sólarhringinn í Torslanda.

Eftir breytingarnar munu verksmiðjurnar í Torslanda geta framleitt 300.000 bíla á ári. Það er ekki síst framleiðsla á hinum nýja XC90 jeppa Volvo sem krefst þessara nýju starfa og verða starfsmenn orðnir 4.600 eftir breytingarnar. Verksmiðjan í Torslanda eru 50 ára gömul í ár en Volvo fyrirtækið er nú 87 ára.

Stækkun verksmiðjunnar í Torslanda er liður í 1.320 milljarða fjárfestingu kínverska bílaframleiðandans Geely í Volvo, en Geely á sem kunnugt er Volvo og keypti fyrirtækið af Ford árið 2010. Það stefnir í 470.000 bíla framleiðslu hjá Volvo í ár og næsta ár verður framleiðslan talsvert meiri.