Litlu liðin biðja um hjálp í bréfi sem var lekið

Bréf frá aðstoðarliðsstjóra Force India, Bob Fernley til Bernie Ecclestone eiganda sjónvarpsréttar af Formúlu 1 hefur verið lekið.

Í bréfinu biðlar Fernley til Ecclestone um aukið fjármagn til minni liðanna eða að sett verði eyðsluþak. Ecclestone hafði þegar sagst ætla að ræða við stóru liðin og óska eftir að þau gefi eftir hluta af verðlaunafé sínu til að hjálpa þeim minni.

Hugmyndin var ekki samþykkt af hinum „stóru fimm,“ sem þýðir að Force India, Lotus og Sauber hafa ekki fengið ósk sína uppfyllta.

Í brefinu hvetur Fernley Ecclestone til að finna leið til að dreifa fjármagninu innan Formúlu 1 á sanngjarnari hátt. Eins og staðan er núna fá stóru fimm liðin (Ferrari, Red Bull, McLaren, Mercedes og Williams) um það bil 70 prósent af því fjarmagni sem er ætlað liðunum, sem eru rúmar 700 milljónir punda (135,7 milljarðar króna).

Af þessu dreifast um 20 prósent til Force India, Lotus, Sauber og Toro Rosso en 10 prósent skiptast á milli Caterham og Marussia.

„Eftir fund okkar í Brasilíu er augljóst að Formúla 1 stefnir í átt til þess að litlu liðin kaupa tilbúna bíla af stóru liðunum, einskonar ofur GP2. Það er jafn augljóst að skipulagshópurinn er ekki að fara að lækka kostnað,“ skrifaði Fernley í bréfið.

„Við viljum undirstrika það að við komum aðallega til þín með ósk um lægri kostnað. Vegna áhugaleysis fyrir því óskum við nú eftir að innkomunni verði dreift á jafnari hátt til að koma á móti auknum kostnaði,“ bætti Fernley við.

Hann hafnar því í bréfinu að peningasóun og stjórnleysi sé um að kenna, líkt og Ecclestone hefur haft orð á. Fernley bendir á að um 70 prósent af innkomunni fari í kaup á vélum fyrir tímabilið.

Að lokum óskar Fernley eftir öðrum fundi á næstunni til að ræða frekari leiðir til að koma fjárhag Formúlu 1 í betri skorður.