Uber vinnur að því að hefja starfsemi í Reykjavík

Uber vinnur nú að því að bjóða leigubílaþjónustu sína hér á landi. Nógu margar undirskriftir hafa safnast á síðu fyrirtækisins til að þeir hefji undirbúning að því að hefja starfsemi í Reykjavík en fyrirtækið hefur sjálft sett sér viðmið um hversu margir þurfi að óska eftir þjónustunni til að hún verði veitt. Viðskiptablaðið greindi frá því í dag.

Á sama tíma og greint er frá þessu á vef fyrirtækisins á fyrirtækið undir högg að sækja í Bandaríkjunum og Indlandi. Stjórnvöld í Delhi á Indlandi hafa bannað starfsemi Uber eftir að ásakanir voru settar fram á hendur bílstjóra að hafa nauðgað kvenkyns farþega.

Konan, sem er 26 ára, notaði Uber appið til að bóka leigubíl til að komast heim til sín. Hún var hinsvegar keyrð á afskekktan stað og nauðgað, að því er segir á vef BBC. Ökumaðurinn er í haldi lögreglunnar en á að koma fyrir dómara í dag.

Uber, sem hefur farið ört vaxandi á Indlandi, er sakað um að hafa ekki framkvæmd nægjanlega bakgrunnsathugun á í bílstjóranum áður en honum var heimilað að keyra fyrir Uber. Erfitt er fyrir yfirvöld að framfylgja banninu og tekur Uber enn við pöntunum í gegnum app fyrirtækisins. Bílar þess eru ekki auðkenndir með neinum hætti.

Uber er starfrækt í 51 landi í dag. Þar á meðal Svíþjóð, Danmörku og Noregi.