Woods: Stutta spilið var hræðilegt

Tiger Woods lýsti stutta spilinu hjá sér sem „hræðilegu“ eftir fyrsta hring á Hero World Challenge í gær enda virtist þessi goðsagnakenndi kylfingur eiga langt í land til þess að berjast við þá bestu á ný eftir langt hlé vegna meiðsla.

Woods lék Isleworth völlinn í Flórída, sem hefur verið heimavöllur hans til margra ára, á 77 höggum í gær eða fimm yfir pari en hann virtist sjálfur mjög hissa á frammistöðu sinni í viðtali við fréttamenn eftir hringinn.

„Þetta var svona einn af þessum dögum þar sem ekkert gekk eftir hjá mér. Ég sló mörg góð högg en mér tókst ekki að nýta þá sénsa sem ég bjó til.“

Þá segir Woods að hann hafi ekki hugmynd um af hverju stutta spilið gekk svona illa en hann þurfti stundum að vippa tvisvar inn á flatir sem hann hitti ekki af örfáum metrum.

„Það var ekkert sem undirbjó mig undir þetta, stutta spilið var hræðilegt. Ég á bara erfitt með að átta mig hvernig ég fór að því að klúðra einföldum vippum á svona hátt.“

Það verður áhugavert að fylgjast með því í hvernig stuði Woods mætir til leiks í dag en annar hringur frá Isleworth verður í beinni útsendingu á Golfstöðinni frá klukkan 19:00 í kvöld.