Syngur um ástir stoltra kvenna

„Aríurnar eru úr óperum eftir Verdi og Strauss og ástin er í brennidepli í þeim öllum,“ segir Helga Rós Indriðadóttir sópran sem er komin suður yfir heiðar til að syngja á hádegistónleikum í Hafnarborg í dag fyrir íbúa höfuðborgarsvæðisins.

Ekki snýst efnið þó um eintóma sælu að hennar sögn heldur um mismunandi leiðir stoltra kvenna til að höndla vonbrigði ástarinnar og endurupplifa góða tímann.

„Við tökum eina aríu úr óperettunni Leðurblökunni, þar eru ungverskir taktar, kampavín og líkjör. Hún er heldur ekkert af baki dottin hún Rosalinde sem við sögu kemur þar,“ segir Helga Rós glaðlega.

Antonía Hevesi stendur fyrir þessum viðburði eins og öðrum hádegistónleikum í Hafnarborg sem jafnan eru fyrsta þriðjudag hvers mánaðar.

Þeir eru styrktir af Samfélagssjóði Rio Tinto Alcan og eru öllum opnir meðan húsrúm leyfir.

Húsið verður opnað klukkan 11.30.