Vesen að skipta um lið enda titlaður FH-ingur í símaskránni

Ísak Rafnsson, varnarmaðurinn efnilegi hjá FH í Olís-deild karla í handbolta, heldur til Þýskalands á morgun þar sem hann mun æfa með C-deildarliðinu HSC Coburg í tvo daga.

Coburg er sem stendur í efsta sæti suðurriðils Bundesligu 3, þriðju efstu deildar Þýskalands.

„Þetta er bara stutt heimsókn. Ég ætla aðeins að kanna aðstæður þarna,“ segir Ísak sem fékk símtal frá liðinu eftir að FH tapaði oddaleiknum gegn Haukum í undanúrslitum Íslandsmótsins en Ísak vakti mikla athygli fyrir frammistöðu sína í einvíginu.

Ísak þykir afar efnilegur varnarmaður og kölluðu handboltaspekingar eftir því að hann fengi tækifæri í landsliðinu eftir leikina gegn Haukum. Þá getur hann einnig spilað sókn og er fínasta skytta.

Þýska liðið hefur fylgst með Hafnfirðingnum í smá tíma en vill nú skoða hann betur á æfingum með liðinu.

„Ég vissi að þeir voru búnir að skoða mig aðeins en svo kom símtalið. Það er alltaf gaman að fá staðfestingu á því að maður sé að standa sig og það sé fylgst með manni. Hvað verður veltur svo bara á því hvernig ég stend mig þarna en í heildina er ég bara að skoða mín mál. Ég ætla í atvinnumennsku einhvern tíma og það væri gaman ef það myndi gerast í sumar,“ segir Ísak.

Hann segist þó ekkert setja sig upp á móti því að spila annað tímabil með FH.

„Það væri ekkert verra að taka annað tímabil hér heima. Þá fengi ég kannski að spila meira og virkilega sýna hvað í mér býr. Mér finnst ég eiga töluvert inni og geta gert betur en á síðustu leiktíð,“ segir Ísak Rafnsson.

Þó hann sé að íhuga félagaskipti þá kemur auðvitað ekki til greina að spila með öðru liði en FH hér heima. Það yrði líka vesen fyrir Ísak sem er titlaður FH-ingur í símaskránni.

„Þú sást það,“ segir hann og hlær. Ég held að ég og Tryggvi bróðir minn höfum byrjað á þessu en í kjölfarið gerðu fleiri þetta líka. Maður er auðvitað trúr sínum klúbbi,“ segir Ísak Rafnsson.