Blam! er komið aftur

Hin geysivinsæla leiksýning Blam! í leikstjórn Kristjáns Ingimarssonar verður sýnd nokkrum sinnum í Borgarleikhúsinu í maí og júní.

Blam! sló hressilega í gegn í Borgarleikhúsinu í fyrra og hefur síðan farið sigurför um Evrópu. Meðal annars hreif hún áhorfendur á Edinborgarhátíðinni í ágúst síðastliðnum og var valin óvæntasta sýning hátíðarinnar.



Sýningin hefur alls staðar hlotið mikið lof og valdi dómnefnd hinna virtu Reumert-verðlauna hana sýningu ársins í Danmörku. Verkið var sýnt sex sinnum í Borgarleikhúsinu í fyrra fyrir troðfullu húsi við mikinn fögnuð leikhúsgesta, hlaut einróma lof gagnrýnenda og sex Grímutilnefningar, meðal annars sem Sproti ársins og hreppti verðlaunin í þeim flokki.



Verkið fjallar um þrjá kúgaða skrifstofumenn sem sólunda lífi sínu á sorglegustu skrifstofu veraldar undir vökulu auga siðblinds yfirmanns. Í hvert sinn sem hann lítur undan, nýta þeir tækifærið til að „blamma“; endurgera uppáhalds senurnar sínar úr hasarmyndum. Þegar yfirmaðurinn fer að „blamma“ með þeim færist fjör í leikinn og við tekur stórhættuleg saga sem leikin er á ógnarhraða og krefst ofurmannlegra átaka.



Sýningafjöldi er takmarkaður að þessu sinni en næstu sýningar eru nú um helgina, ein í kvöld og tvær á morgun. Sýningin snýr síðan aftur í Borgarleikhúsið í júní og verða þá fjórar sýningar.