Með flugu í höfðinu - Ekki fyrir viðkvæma

Hver sá sem heldur því fram að veiðimaður verði góður flugukastari af æfingunni einni saman gleymir einu mikilvægu atriði.

Það er nóg að æfa sig vel og lengi, sá partur er réttur, en það þarf líka að gera ráð fyrir litlum óhöppum á vegsemd þeirri sem gerir hvern þann flugukastara færan í flestan sjó.  Nokkrir þættir hafa áhrif á flugukastið eins og vindur, en oft á tíðum gerast óhöppin þegar menn eiga síst von á þeim og þá er gott að hafa handlagna veiðifélaga sér við hlið.

Eitt af því óþægilegasta sem nokkur fluguveiðimaður getur lent í er að fá fluguna í sig og þá t.d. á óvarða húð.  Beittur krókurinn fer oft á kaf í húðina með tilheyrandi óþægindum og það er þess vegna ekki að ástæðulausu að veiðimenn nota hlífðargleraugu því sjónskaðar af völdum þessara slysa eru ekki óþekktir.  Sem betur fer eru slysin fátíð og þau geta skeð hvenær sem er, fyrir hvern sem er.  Hinir eldhressu veiðimenn Ásmundur og Gunnar Helgasynir hafa ekki farið varhluta af óhöppum eins og sést á meðfylgjandi myndbandi.  Gunnar fékk í einum af veiðitúrum þeirra félaga fluguna í kinnina.  Á meðfylgjandi myndbandi sést þetta fræga atvik.

"Við vorum á Nessvæðinu 2012 í talsverðum vindi og Gunni setur fluguna svona skemmtilega í kinnina á sér. Það var eins og eins og Gunni hefði verið kýldur í andlitið, bæði brá honum svo við þetta og þá var þetta býsna óþægilegt. Þetta var í síðasta kasti dagsins þannig að við fórum bara niður í hús þar sem Hilmar Hansson tók á móti Gunna og sá kunni réttu handtökin. Lykilatriðið er víst að halda auganu niðri, að húðinni, og kippa svo snöggt og ákveðið. Eins og Gunni sagði, þá var miklu óþægilegra að fá fluguna í kinnina en að láta kippa henni úr. Það blæddi sama og ekkert og eftir smá stund sást ekkert á Gunna, engin bólga og engin ummerki. Glöggir lesendur sjá líklega að þarna er flugan Night Hawk á ferðinni." Sagði Ásmundur varðandi þetta atvik.  Eins og sést á myndbandinu eru handtökin örugg hjá Hilmari Hanssyni.

Veiðimenn ættu að hafa hugfast að nota alltaf veiðigleraugu og vera með smá sjúkrakassa í bílunum þegar á veiðislóð er komið enda gera slysin aldrei boð á undan sér.