Mörg hundruð manns vinna að þróun Apple bíls

Finnur Thorlacius skrifar 4. mars 2015 11:30

Samkvæmt fréttum frá Wall Street Journal er bíll frá tölvuframleiðandanum Apple á leiðinni og sagt er að mörg hundruð manns vinni að þessu verkefni hjá Apple.

Þessi bíll er, eins og eðlilegt gæti talist, rafmagnsbíll og hefur verkefni kringum smíði hans fengið nafnið Project Titan. Bíllinn er í laginu eins og smár sendibíll, eða „strumpastrætó“, eins og gárungarnir myndu kalla hann. Ef að líkum lætur yrði hann þó örugglega jafn frumlega hannaður og aðrar vörur frá Apple.

Apple hefur ráðið nokkra reynda menn úr bílageiranum til að leiða verkefnið og fer verkfræðingurinn Steve Zadesky, sem áður vann hjá Ford, fyrir hópnum. Apple réð einnig Johann Jungwirth frá Mercedes Benz til verksins. Apple hefur nú hafið viðræður við austurríska fyrirtækið Magna Steyr um eiginlega smíði bílsins, en Magna Steyr er þekkt fyrir að hafa smíðað margan bílinn fyrir þekkta bílaframleiðendur, ekki síst blæjubíla, sem fyrirtækið hefur sérhæft sig í.

Sögusagnir herma að Apple hafi undanfarið tælt nokkra af starfmönnum Tesla til sín með bæði tvöföldun launa og undirskriftarbónus upp 250.000 dollara, eða ríflega 33 milljónir króna. Það eiga nokkrir þeirra ekki hafa staðist og því hefur nokkur straumur starfsfólks verið frá Tesla til Apple undanfarið. Oft áður hafa fréttir verið færðar af hugmyndum Apple að smíða svokallaðan iCar, en nú virðist svo komið að styttast fer í bíl frá Apple, hvort sem hann mun fá heitið iCar eður ei.

Tækni