Taka í notkun breytt og stækkað vöruhús

Icelandair Cargo og IGS hafa tekið í notkun breytt og stækkað vöruhús á Keflavíkurflugvelli en þetta kemur fram í tilkynningu frá Icelandair.

Þar segir að umtalsverðar breytingar hafi verið gerðar á vöruhúsinu á Keflavíkurflugvelli.  Vöruhúsið hafi verið stækkað um þúsund fermetra og er nú alls 6000 fermetrar af stærð.  Öll stækkunin er hitastýrð til að koma til móts við gæðakröfur í matvælaflutningum.  

„Með breytingunum er verið að mæta aukinni eftirspurn eftir flutningum á ferskvöru með flugi, svo sem innflutningi á grænmeti og útflutningi á sjávarafurðum.  Gæðakröfur á  flutningum ferskra matvæla eru mjög háar og með nýju kældu vinnurými í vöruhúsi verður kælikeðjan styrkt.  Með þessu móti er hægt að tryggja betri þjónustu og mæta auknum frakt flutningum með farþegaflugi Icelandair um Keflavíkurflugvöll þar sem ferlar eru aðrir en með fraktvélum,“ segir í tilkynningunni.

Einnig voru verulegar breytingar gerðar á flæði og uppstillingu vöruhússins og umtalsverðar fjárfestingar hafa verið gerðar til að mæta ströngum öryggiskröfum um skimun og öryggisþáttum tengdum flugfrakt.  

Þannig eiga afköst vöruhússins að aukast til muna og afgreiðslutími helst stuttur þrátt fyrir aukningu í flutning og auknum öryggiskröfum yfirvalda.