Grátlegt tap gegn Serbíu | Myndir

Ísland tapaði í kvöld fyrir Serbíu, 5-4, á grátlegan máta. Serbarnir skoruðu sigurmark leiksins þegar nítján sekúndur lifðu af leiknum.

Ísland komst í 2-0 forystu strax í fyrsta leikhluta með mörkum Egils Þormóðssonar og Péturs Maack. Serbarnir svöruðu þó fyrir sig með tveimur mörkum á síðustu tveimur mínútum leikhlutans.

Tvívegis náði Ísland að komast aftur yfir í leiknum en þau mörk skoruðu Ingvar Jónsson og Úlfar Andrésson. Alltaf áttu Serbarnir svar og það var svo Marko Sretovic sem skoraði sigurmark Serbanna í blálokin, sem fyrr segir.

Keppt er í A-riðli 2. deildar HM en Ísland er nú í öðru sæti riðilsins með þrjú stig, rétt eins og Spánverjar og Serbar. Rúmenía er eitt á toppnum með fullt hús stiga að loknum tveimur umferðum.