Gunnar Magnússon ráðinn næsti þjálfari Hauka

Tekur við liðinu eftir tímabilið þegar Patrekur Jóhannesson lætur af störfum.

Gunnar Magnússon, þjálfari Íslands- og bikarmeistara ÍBV, var í dag kynntur til leiks sem nýr þjálfari Olís-deildarliðs Hauka í handbolta.

Gunnar skrifaði undir tveggja ára samning við Hafnarfjarðarliðið.

Hann tekur við liðinu eftir tímabilið af Patreki Jóhannessyni, en Patrekur sagði starfi sínu lausu fyrir nokkrum vikum síðan. Hann ætlar að einbeita sér að austurríska landsliðinu.

Patrekur klárar tímabilið með Haukunum, en þeir eru komnir í undanúrslit Olís-deildarinnar og mæta þar deildarmeisturum Vals.

Gunnar féll úr leik með Eyjamennina eftir tvo tapleiki gegn Aftureldingu í átta liða úrslitum, en vitað var fyrir úrslitakeppnina að Gunnar ætlaði ekki að þjálfa ÍBV áfram.

Hann gerði Eyjaliðið að Íslandsmeisturum í fyrra þegar liðið var nýliði í úrvalsdeildinni og bætti svo um betur með því að vinna bikarmeistaratitilinn í febrúar.

Gunnar hefur áður þjálfað Víking, HK og í Noregi auk þess sem hann er aðstoðarþjálfari íslenska landsliðsins.