Eyðsluþak með snúning

Fyrrum forseti FIA, Max Mosley hefur lengi verið talsmaður einhverskonar eyðsluþaks í Formúlu 1. Hann hefur nú komið fram með nýja hugmynd um útfærslu á slíku.

Mörg lið hefðu sennilega misst af fyrstu keppni tímabilsins ef Bernie Ecclestone hefði ekki greitt verðlaunafé vegna síðasta árs snemma.

Þessi fyrirgreiðsla hefur ekki leyst vandann heldur aðeins frestað honum. Eina leiðin til að leysa vandann er að setja eyðsluþak á starfsemi Formúlu 1 liðanna. Mosley reyndi að koma slíku á árið 2009. Sú tilraun mistókst og leiddi til hótanna stóru liðanna um að stofna til eigin Formúlu.

Bretinn segir að skoða þurfi aftur hvort hugmyndin geti átt upp á pallborðið. Hann vill þó setja snúning á upprunalegu hugmyndina um einfalt eyðsluþak.

Nýja hugmyndin felst í því að þau lið sem vilja eyða upp fyrir þakið geta það og halda sig þá við núverandi reglur. Hin liðin sem halda sig innan eyðsluþaksins fengju meira tæknilegt frelsi og gætu þróað bílana meira en þeir sem eyða meira.

„Ég sé fyrir mér að innan skamms myndu öll lið fella starfsemi sína undir eyðsluþakið,“ sagði Mosley.

„Liðin myndu átta sig á að það er hægt að hafa góða akstursíþrótt og afar tæknilega þróaða bíla fyrir 100 milljónir (sterlingspunda),“ bætti Mosley við.