DNA Yrsu glæpasaga ársins

Hið íslenska glæpafélag velur árlega glæpasögu ársins sem hlýtur Blóðdropann. Glæpasaga ársins 2014 er DNA eftir Yrsu Sigurðardóttur sem jafnframt verður framlag Íslands til norrænu glæpasagnaverðlaunanna, Glerlykilsins, á næsta ári.

Í rökstuðningi dómnefndar segir meðal annars:

„Einn helsti styrkur Yrsu hefur verið að skapa spennu og eftirvæntingu í bókum sínum og vekja grun um óhugnað og hér tekst henni mjög vel upp. Lesandinn fylgist með framvindu rannsóknarinnar og feilsporum lögreglunnar. Fleiri persónur dragast óvænt inn í atburðarásina og morðunum fjölgar. Yrsu tekst að halda lesandanum í heljargreipum spennu og eftirvæntingar alveg fram á síðustu blaðsíðu og sögulok eru sannarlega óvænt og ófyrirséð.“

Í dómefnd sátu Inga Magnea Skúladóttir, Kristján Jóhann Jónsson og Úlfar Snær Arnarson.