Mercedes fljótastir og McLaren áreiðanlegir

Nico Rosberg ók Mercedes bíl sínum hraðast allra á seinni æfingadegi Formúlu 1 á Red Bull Ring í Austurríki í gær. Pascal Wehrlein ók hraðast fyrir Mercedes á þriðjudag. McLaren rauf 100 hringja múrinn.

Átta bílar komust meira en 100 hringi  og merkilegast er að McLaren bíllinn í höndunum á Fernando Alonso komst 104 hringi. Alonso var „frekar kátur,“ með áreiðanleika bílsins.

Esteban Gutierrez ók Ferrari bílnum og var annar hraðasti maður seinni dagsins. Valtteri Bottas ók Williams bílnum og varð þriðji og sá eini sem ekki fór meira en 100 hringi. Vert er að geta þess að Manor liðið tók ekki þátt í æfingum að þessu sinni.

Wehrlein var hraðastur á fyrri degi æfinga. Esteban Ocon varð annar á Force India bílnum, en hann varði deginum að mestu í að prófa nýja hluti fyrir nýjan bíl Force India. Nýji bíllinn verður kynntur til sögunnar á Silverstone brautinni þar næstu helgi, þegar breski kappaksturinn fer fram.

Max Verstappen á Toro Rosso varð þriðji og Antonio Fuoco varð fjórði á Ferrari en hann endaði daginn á varnarvegg eftir að hafa misst stjórn á bílnum. Ungi ökumaðurinn fór með eitt dekk út á blautt gras og missti þar með grip og því fór sem fór.