Miklar framfarir framundan hjá McLaren

McLaren liðið telur að það verði orðið samkeppnishæft undir lok tímabilsins. Það er markmið liðsins samkvæmt keppnisstjóra þess, Eric Boullier.

McLaren hefur einungis náð í fimm stig í fyrstu níu keppnum tímabilsins. Jenson Button varð áttundi í Mónakó og Fernando Alonso varð tíundi á Silverstone.

Honda er um að kenna samkvæmt McLaren, en báðir aðilar eru ákveðnir í að vinna saman að því að bæta afl og áreiðanleika vélarinnar. Miklar framfarir eru framundan að sögn Boullier.

„Við stöndum okkur ekki nógu vel í augnablikinu - en við vitum að bíllinn er góður,“ sagði Boullier.

„Gefið okkur tíma. Þegar við höfum greitt úr stærstu áreiðanleikavandamálunum sem við stöndum frammi fyrir munum við taka stórt skref fram á við. Við gætum leyst eitt vandamál og fundið hálfa sekúndu og svo leyst annað og fundið aðra hálfa sekúndu,“ bætti Boullier við.

Keppnisstjórinn fullyrðir að liðið geti verið framarlega við lok tímabilsins. Þetta veltur allt á Honda og ef það gengur vel hjá Honda telur Boullier að verðlaunasæti verði möguleiki.

„Markmiðið er ennþá að vera samkeppnishæft lið undir lok tímabilsins. Ef við getum afhjúpað getuna verðum við í baráttunni - með smá heppni - um verðlaunasæti. Ef við náum vélarrafalnum í gang á beinu köflunum getum við sparað mikinn tíma. Við getum það ekki í dag,“ sagði Boullier að lokum.