GSÍ um Björgvin: Golfbílar veita forskot

Björgvin Þorsteinsson, sexfaldur Íslandsmeistari í golfi, hætti í morgun keppni á Íslandsmótinu í höggleik eftir að hafa spilað fyrstu sex holurnar.

Þetta var í 52. árið í röð sem Björgvin tekur þátt á Íslandsmótinu. Fyrir mótið hafði hann beðið um leyfi til að nota golfbíl í mótinu þar sem hann gengst nú undir krabbameinsmeðferð. Beiðni hans var hafnað af mótanefnd GSÍ.

„Ég hætti eftir sex holur. Það er pirringur út í þetta lið sem hafði sitt að segja. Í hreinskilni sagt  þá var maður ekki beint upplagður til golfleiks,“ sagði Björgvin við mbl.is í dag.

„Ég skil vel hans afstöðu en mótanefnd hefur tekið skýra afstöðu til slíkra mála og ekki heimilað notkun golfbíla í efsta flokki á Íslandsmóti,“ segir Hörður Þorsteinsson, framkvæmdastjóri GSÍ, í samtali við Vísi.

Björgvin hafnar þeim rökum að golfbíll veiti kylfingum ákveðið forskot en því er Hörður ekki sammála.

„Golf snýst um meira en að slá bara bolta. Það snýst líka um líkamlegt atgervi, úthald og einbeitingu. Það er einnig hægt að nota bílana til að skýla sér fyrir ákveðnum aðstæðum,“ segir Hörður.

„Fyrir menn sem eru veikir, líkt og í tilfelli Björgvins, jafnar golfbíll leikinn. Við getum ekki gert upp á milli keppenda í keppni þeirra bestu og gefið einhverjum ákveðna forgjöf.“

Hörður hefur skilning á því að Björgvin sé ósáttur en bendir á að ekki sé heimilt að nota golfbíla í alþjóðlegum mótum.

„Sú ákvörðun að heimila ekki notkun golfbíla á sterkasta mótum landsins var tekin óháð því hvaða einstaklingar ættu í hlut. Auðvitað er leiðinlegt að geta ekki leyft Björgvini að nota golfbíl en við höfum engan annan valkost.“

Hörður segir að heimilt sé að nota golfbíla í Íslandsmóti eldri kylfinga sem og neðri deildum.