Forseti GSÍ: Leiðinlegur blettur á annars góðri helgi

Haukur Örn Birgisson, forseti Golfsambands Íslands, staðfesti í samtali við Vísi í dag að betur yrð farið yfir verklagið þegar leikmönnum er tilkynntur leiktími á næstu sveitakeppni sambandsins. Golfklúbbur Kiðjabergs sendi frá sér yfirlýsingu í gær þar sem vinnulag mótastjórnar var fordæmt en hvorki leikmenn né liðsstjóri fengu veður af breytingunni á rástíma.

Um var að ræða úrslitaleikinn í 2. deild sveitakeppninar þar sem GKB mætti Golfklúbbnum Jökli, GJO í Vestmannaeyjum. Upphaflega stóð til að leikmenn ræstu klukkan 10.06 en ákveðið var að flýta rástímanum um klukkutíma.

„Ég kom ekki að þessu máli en það er ljóst að þetta verður rannsakað. Þetta kom uppi seinni part gærkvöldsins og ég get því miður ekki svarað of miklu eins og staðan er en vissulega er þetta leiðinlegur blettur á annars góðri helgi.“

Breytingin á rástíma skilaði sér til allra annarra klúbba en GKB en Haukur vissi ekki skýringu á því.

„Það var breyting sem skilaði sér til allra klúbbanna nema til þeirra sem varð til þess að þeir mættu ekki á tilskyldum tíma. Í reglum golfsins stendur skýrt að það þýði tap en við þurfum að skoða það hvað það var sem olli þessu,“ sagði Haukur sem gerði ekki ráð fyrir að leikurinn yrði endurtekinn.

„Eins og staðan er í dag þykir mér það ólíklegt. Þrátt fyrir að þetta sé leiðinlegt atvik er mótinu er lokið sömuleiðis verðlaunaafhendingunni. Nú þurfum við að fara yfir hvar vandinn gerðist og sjá til þess að þetta gerist ekki aftur.“