Brokkólí- og avókadósalat með eggjahræru

Ásthildur Björnsdóttir heldur úti vefsíðunni Matur milli mála þar sem hún deilir uppskriftum að alls konar réttum, bæði sætum og saðsömum. Þar sem rútína skellur nú á landanum með komu haustsins þá vantar marga oft nýja rétti til að elda í kvöldmatinn og því er kjörið tækifæri að næla sér í hollustu og nýjan rétt með þessu frábæra salati.

Um réttinn segir Ásthildur: „Það er alveg spurning hvort hægt sé að kalla þetta salat – en ég geri það nú samt því að það er svo mikið grænmeti í þessum rétti. Mér finnst egg afskaplega góð og borða þau nánast daglega, 1-3 stykki á dag, ýmist í eggjahræru, sem spæld egg eða harðsoðin. Egg eru nefnilega stútfull af hollustu og svo eru þau bara svo góð!“

Hráefni

• Brokkólí

• Kókosolía

• Egg

• Fetaostur

• Sveppir – smátt saxaðir

• Rauðlaukur – smátt saxaður

• Steinselja – smátt söxuð

• Túrmerik

• Svartur pipar

• Sjávarsalt

• Dijon-sinnep

• Rucola-salat

• Tómatar

Aðferð

Brokkólíið er skorið gróft og sett út í sjóðandi heitt vatn í 4-8 mínútur.

Kókosolían er hituð á pönnu við meðalhita.

Eggi, fetaosti, sveppum, rauðlauk, steinselju, kryddinu og sinnepi blandað saman í skál og hellt út á heita pönnuna.

Hrært duglega í þar til enginn vökvi er lengur á pönnunni – tekur örfáar mínútur.

Rucola-salati dreift á disk.

Eggjahrærunni hellt þar yfir og öllu hinu dreift í kring.