Lewis Hamilton á ráspól í Belgíu

Lewis Hamilton á Mercedes náði ráspól í Belgíu. Liðsfélagi hans, Nico Rosberg varð annar og Valtteri Bottas á Williams þriðji.

16 sinnum í síðustu 47 keppnum á Spa hefur ökumaður á ráspól unnið keppnina.

Mercedes menn tóku snemma forystu í fyrstu lotu á millihörðum dekkjum. Sergio Perez átti hraðasta hring um tíma eftir að hann fór út á mjúkum dekkjum.

Will Stevens og Roberto Merhi á Manor duttu út í fyrstu lotu ásamt Jenson Button og Fernando Alonso á McLaren og Felipe Nasr á Sauber. Mercedes menn náðu toppsætunum tveimur á millihörðum dekkjum.

McLaren sætir samtals 105 sæta víti eftir tímatökuna. Button verður færður aftur um 50 sæti og Alonso 55. Safnast þegar saman kemur og þegar allt er sett nýtt í vélina hrúgast vítin upp.

Kimi Raikkonen stöðvaði í brautarkanti, Ferrari bíllinn drap á sér. „Það bilaði eitthvað,“ sagði Raikkonen í talstöðinni. Rauðum flöggum varð veifað í kjölfarið og tímatakan stöðvuð á meðan bíllinn var fjarlægður.

Max Verstappen ákvað að fara ekki út í annarri lotu. Hann átti eftir að færast aftur um 10 sæti og fá nýja vél. Það var tilgangslaust að mati Toro Rosso að reyna að lágmarka skaðann.

Raikkonen og Verstappen komust ekki áfram. Auk þeirra sátu eftir Nico Hulkenberg á Force India, Daniil Kvyat á Red Bull og Marcus Ericsson á Sauber.

Baráttan um ráspól var á milli Mercedes ökumannanna. Hamilton var á undan út á brautina og setti góðan tíma, 1:47,449. Rosberg gat ekki svarað í fyrstu tilraun lotunnar heldur endaði á 1:47,895. Hann gerði augljós mistök og átti inni msimuninn og meira til.

Rosberg reyndi sitt besta en það dugði ekki til. Hraði Sebastian Vettel á Ferrari bílnum virtist hverfa í lokatilrauninni.

Bein útsending frá keppninni hefst klukkan 11:30 á Stöð 2 Sport á morgun, sunnudag.

Hér fyrir neðan má sjá öll helstu úrslit helgarinnar.